Þrefalt afmæli!

 

Gróttustrákarnir Arnór Guðjónsson, til hægri, og Axel Ingi Sveinsson, voru í hátíðarskapi í dag. Arnór fagnar 12 ára afmæli sínu og Axel laumaði því að blaðamanni að Ella amma hans ætti líka afmæli.

Og svo kom upp úr dúrnum, þegar Axel hugsaði sig aðeins lengur um, að hann á sjálfur skírnarafmæli í dag!

Til hamingju með daginn strákar, og amma Ella!

KA strákarnir Goðamótsmeistarar

KA-menn unnu úrslitaleik A-liðanna og unnu þar með gullverðlaunin. KA-strákarnir unnu lið Fjarðabyggðar 3:1 í úrslitaleiknum. Austfirðingarnir komust í 1:0, staðan í hálfleik var 1:1 en tvö flott mörk í seinni hálfleiknum tryggðu KA sigurinn.

Þá er mjög vel heppnuðu móti lokið. Leikirnir voru 145 og alls skoruð 734 mörk, 5 að meðaltali.

Ljósmyndir úr úrslitaleikjunum og af öllum liðum sem fengu verðlaun verða komnar inn í sunnudagsalbúmið hér til hægri seinna í dag.

Takk fyrir frábært mót, strákar! Þið stóðuð ykkur allir vel.

KA, Þróttur, Breiðablik og Mývetningur með gull

Fjórum úrslitaleikjum er lokið og þar nældu KA-menn, Þróttarar, Blikar og Mývetningar sér í gull.

Úrslit urðu þessi:

B-lið KA - KS 1:0

C-lið Fjarðarbyggð - Þróttur R 0:1

D-lið Grótta - Breiðablik 0:1

E-lið Mývetningur - Þróttur R 0:0

Framlengja þurfti úrslitaleik D-liðanna. Ekkert var skorað í venjulegan leiktíma, heldur ekki í framlengingu og því þurfti að kasta upp peningi til þess að fá fram úrslit. Mývetningar höfðu heppnina með sér í þetta skipti og fá því gullverðlaunin.

Úrslitaleikirnir hefjast brátt

Það er farið að síga á seinni hluta Goðamótsins. Úrslitaleikirnir hefjast senn; klukkan 13.00 hefjast fjórir og sá síðasti, úrslitaleikur A-liðanna, hefst kl. 13.40. Strax að þeim leik loknum verður verðlaunaafhending og mótinu lýkur með hinni rómuðu Goðagrillveislu fyrir utan Bogann þar sem allir fá pylsu og kók.

Úrslitaleikir B, C, D og E-liða eru um það bil að hefjast sem fyrr segir:

B-lið KA - KS

C-lið Þróttur - Fjarðarbyggð

D-lið Breiðablik 2 - Grótta

E-lið Mývetningur - Þróttur 2

Úrslitaleikur A-liða verður kl. 13.40, þar sem mætast KA og Fjarðarbyggð.

Grótta, KA og Breiðablik í 3. sæti

Úrslitaleikjunum um 3. sæti Goðamótsins er nú lokið.

Leikirnir fóru sem hér segir; feitletruðu liðin sigruðu.

E-lið Grótta - Breiðablik1 4:3

D-lið KA -  Breiðablik1 2:1

C-lið Þór - KA 0:3

B-lið Þór - Breiðablik 1:2

A-lið Þór - Breiðablik 1:4

Allir til fyrirmyndar

Strákarnir á Goðamóti helgarinnar hafa verið til algjörrar fyrirmyndar. Starfsmenn okkar í Glerárskóla, þar sem aðkomuliðin gista og borða bæði morgunverð og kvöldverð, segja að öll liðin hafi verið sérlega kurteis og prúð. Sumir strákanna sungu meira að segja fyrir starfsmenn í eldhúsinu eftir matinn og þökkuðu þannig fyrir sig!

Á myndinni eru Völsungar frá Húsavík á kvöldvökunni í gærkvöldi í Boganum.

A-lið: Fjarðarbyggð og KA mætast í úrslitaleiknum

KA og Fjarðarbyggð leika til úrslita í keppni A-liðanna á Goðamótinu.

Undanúrslitunum er nýlokið og þar gerðu lið Fjarðarbyggðar og Breiðabliks jafntefli. Staðan var 1:1 eftir framlengingu og því þurfti að grípa til þess að kasta upp peningi til að fá fram úrslit, og heppnin var Austfirðingunum.

Í hinum undanúrslitaleiknum sigruðu KA strákarnir okkar menn í Þór 3:1.

Úrslitaleikur KA og Fjarðarbyggðar verður síðasti leikur mótsins og hefst kl. 13.40.

Leikur Þórs og Breiðabliks um þriðja sætið hefst kl. 11.40.

Það er athyglisvert að liðin sem leika til úrslita, KA og Fjarðarbyggð voru saman í riðli á mótinu. KA vann alla fjóra leiki sína, m.a. Fjarðarbyggð 1:0, og Austfirðingarnir unnu þrjá leiki.

Blikarnir unnu alla fjóra leikina í hinum riðlinum og voru með markatöluna 13:1.

Hverjir leika um þriðja sætið?

Nú er ljóst hverjir keppa um þriðja sæti á Goðamótinu í öllum liðum nema A. Undanúrslitaleikjum A-liðanna er um það bil að ljúka og við birtum frétt af þeim viðureignum hér um leið og hún berst.

En leikirnir um þriðja sæti eru sem sagt þessir.

B-lið Þór - Breiðablik 2 (kl. 11.00)

C-lið Þór - KA (kl. 11.00)

D-lið KA - Breiðablik 1 (kl. 10.20)

E-lið Grótta - Breiðablik 1 (kl. 10.20)

B-liðin: KA og KS í úrslitaleikinn

Það verða KA og KS sem leika til úrslita í keppni B-liðanna á Goðamótinu.

Í undanúrslitum núna áðan sigruðu KA-menn nágranna sína í Þór 2:0 og Siglfirðingar lögðu Breiðablik 2, leikurinn endaði 1:0.

Úrslitaleikurinn hefst kl. 13.00 og á sama tíma byrja úrslitaleikir C, D og E-liða.

Úrslitaleikur A-liða á Goðamótinu hefst svo kl. 13.40 og er síðasti leikur mótsins.

Í svokölluðum B-úrslitum B-liðanna leika Breiðablik 1 og Leiknir um efsta sætíð, en í þessari keppni taka þátt þau lið sem ekki komust upp úr riðlunum í upphafi.

Frábær kvöldvaka

 

Goðamótskvöldvökunni er nýlokið og hún heppnaðist afar vel að vanda.

Strákarnir tóku þátt í knattþrautum af ýmsu tagi; héldu bolta á lofti, tóku víti, röktu bolta framhjá keilum og svo framvegis, og þá var auðvitað keppt í reiptogi eins og venjulega. KA-menn stóðu að þessu sinni upp sigurvegarar í þeirri grein, höfðu betur í úrslitatoginu gegn Völsurum.

Stemmningin á kvöldvökunni var frábær eins og svo oft áður. Strákarnir eru eflaust orðnir þreyttir eftir langan og strangan dag og einhverjir örugglega þegar á leið í háttinn því fyrstu átta liðin hefja leik strax kl. 8.20 í fyrramálið.

Nokkrar myndir af kvöldvökunni eru komnar inn í laugardagsalbúmið.

A lið: Þór - KA og Breiðablik - Fjarðarbyggð í undanúrslitum

Síðustu leikjum riðlakeppninnar er nýlokið og ljóst hverjir mætast í undanúrslitum á morgun, í keppni A- og B-liðanna. Í síðustu umferðinni hjá A-liðunum urðu úrslit þau að Þór og Leiknir gerðu jafntefli, Valur vann Hött, KA vann Fjarðarbyggð og Grótta vann Þrótt.

Undanúrslitaleikirnir í A-liðakeppninni eru því þessir:

Þór - KA

Breiðablik - Fjarðarbyggð

Leikirnir hefjast báðir klukkan 9 í fyrramálið.

Í undanúrslitum B-liðanna í fyrramálið eigast Akureyrarliðin líka við; KA mætir sem sagt Þór og í hinum leiknum eigast við KS og lið Breiðabliks 2. B-liðin hefja leik kl. 8.20.

B-liðin: KS, KA, Breiðablik og Þór áfram

KS er efst með 9 stig í A-riðli hjá B-liðunum og KA er með 7 stig. Liðin eru bæði nær örugg áfram.

Í hinum riðlinum eru Breiðablik og Þór með 9 stig og örugg áfram. Þórsarar hafa lokið leikjum sínum í riðlinum en Blikarnir eiga einn eftir.

A-lið Blika sigursælt

Breiðablik er með 12 stig í A-riðli A-liðakeppninnar. Blikarnir unnu alla fjóra leikina en Þórsarar eru með 6 stig og eiga einn leik eftir. Þórsarar fylgja Blikunum væntanlega áfram í undanúrslitin.

Lið KA og Fjarðarbyggðar eru örugg áfram í undanúrslitin úr hinum riðlinum. Þau hafa bæði sigrað í þremur leikjum og hafa 9 stig - en mætast á eftir í síðasta leik riðilsins, kl. 17.20. Þá kemur íljós hvort liðið vinnur riðilinn og sleppur þar með við að mæta Blikunum í fjögurra liða úrslitum.

Blikarnir fjölmennastir

Breiðabliksmenn úr Kópavogi eru fjölmennastir allra á Goðamótinu að þessu sinni. Alls eru 82 strákar hér fyrir hönd Breiðabliks auk rúmlega 20 þjálfara og fararstjóra. Blikarnir eru með 9 lið á mótinu.

KA, Þróttur og Þór áfram í C

 

KA og Þróttur eru bæði örugg áfram úr A-riðli C-liðakeppninnar. Liðin eru bæði með 9 stig - hafa sem sagt unnið þrjá leiki, en eiga eftir að mætast og þá kemur í ljóst hvort hreppir efsta sætið í þessum riðli. Sá leikur hefst klukkan fjögur.

Í hinum riðlinum hafa heimamenn í Þór unnið alla þrjá leikina og eru með 9 stig. Eru öruggir áfram en eiga samt einn leik eftir. Liðin sem berjast um annað sæti riðilsins eru Samherjar og Fjarðarbyggð. Myndin er einmitt úr leik þeirra í morgun. Samherjar mæta Breiðabliki 2 klukkan fjögur og á sama tíma keppir Fjarðarbyggð við Þór.

Af næringu

 

Samlokurnar ruku út í Hamri um hádegisbil eins og venjulega á laugardögum þegar Goðamót stendur yfir. Öllum keppendum er þá boðið upp á heita samloku og djús.

Ballið er líka byrjað í versluninni Brynju í innbænum, enda Goðamótsstrákarnir farnir að streyma þangað inn eftir. Tvær rútur eru í förum að vanda á milli Hamars, félagsheimilis Þórs, og Brynju og enn hefur enginn sést koma öðru vísi en brosandi úr ísrútunni þegar hún staðnæmist á ný við Hamar eftir ferðina.

Föstudagsbrunnurinn loks tæmdur

Þá eru loks allar ljósmyndir frá föstudeginum komnar inn í albúmið, alls 219 myndir úr leikjum hinna ýmsu liða sem hinn opinberi ljósmyndari Goðamótsins tók. Bæst hefur í laugardagsalbúmið og fleiri koma þangað inn á eftir.

Ein skemmtilegasta myndin frá því í gær er þessi, þegar einn Blikastrákanna tók glæsilega aukaspyrnu gegn KA; einbeitingin er algjör enda var skotið gott, en hann skoraði að vísu ekki.

 

Mývetningar hafa unnið alla leikina

Línur eru að skýrast í riðlakeppni D og E-liðanna.

Mývetningar hafa unnið alla þrjá leikina í A-riðli E-liðakeppninnar; þeir sigruðu Þór, Breiðablik og Þrótt 1 og eru öruggir áfram í undanúrslitin. Breiðablik er með 7 stig og fara Blikarnir líklega áfram með Mývetningum. Á myndinni er einn leikmanna í liði Mývetninga í viðureigninni gegn Þór núna áðan.

Í hinum riðli E-liðakeppninnar stendur baráttan um efsta sætið á milli Gróttu og Þróttar 2. Bæði liðin eru með 6 sig og fara væntanlega bæði í undanúrslitin.

Í keppni D-liðanna eru KA og Breiðablik efst og jöfn með 6 stig í A-riðli og nánst örugg áfram. Í hinum riðlinum er Grótta efst með 9 stig og baráttan um annað sætið er á milli Breiðabliks 2 og Fjarðarbyggðar.

Ein umferð er eftir af riðlakeppnininni bæði hjá D og E liðum.

Rúmlega 100 myndir

 

Föstudagsmyndirnir í albúminu hér til hliðar eru orðnar 104 en reyndar er von á miklu fleirum. Ljósmyndarinn ýtti svo oft á takkann í gær - en komst ekki yfir að hlaða öllum myndunum á síðuna í gærkvöldi. Þær mjatlast inn á eftir um leið og myndir frá leikjum dagsins í dag.

Á myndinni er galvaskur Magnamaður frá Grenivík með boltann í leik gegn Þrótti núna rétt áðan.

Hvítt og fallegt

Það snjóaði töluvert á Akureyri í nótt og gerir reyndar enn. Það er logn og fallegt veður. Á myndinni eru nokkrir strákar í morgun á leiðinni úr Glerárskóla, þar sem þeir gista, yfir í Hamar og Bogann.

Mörkunum er líka byrjað að snjóa í Boganum - fyrstu leikirnir hófust kl. 8 á morgun og síðustu leikirnir í kvöld hefjast kl. 19.40.